दापोली : रत्नागिरी जिल्ह्यातील ग्रामीण प्रशासन अधिक सक्षम, सुसज्ज आणि नागरिकाभिमुख करण्यासाठी ही अत्यंत महत्वाची पायरी आहे. नागरिकांना विविध कामांसाठी भटकंती करावी लागू नये आणि सर्व सेवा एकाच छताखाली उपलब्ध व्हाव्यात, हा या निर्णयामागील मुख्य उद्देश आहे. संबंधित यंत्रणेला प्रशासकीय इमारतीचे बांधकाम दर्जेदार व निश्चित कालावधीत पूर्ण करण्याच्या स्पष्ट सूचना देण्यात आल्या आहेत, असे प्रतिपादन राज्यमंत्री ना. योगेश कदम यांनी केले.
रत्नागिरी जिल्ह्यातील पंचायत समिती स्तरावरील पायाभूत सुविधा बळकट करण्याच्या दृष्टीने शासनाने मंडणगड, दापोली आणि खेड येथील प्रशासकीय इमारतींच्या बांधकाम व विस्तारीकरणासाठी प्रशासकीय मान्यता प्रदान केली आहे. मंडणगड येथे नवीन प्रशासकीय इमारतीच्या बांधकामासाठी 9 कोटी 46 लाखरूपये, दापोली येथे नवीन प्रशासकीय इमारतीसाठी 9 कोटी 42 लाख रूपये, तर खेड पंचायत समितीच्या इमारतीच्या विस्तारीकरणासाठी 10 कोटी 52 लाख रूपये इतका निधी मंजूर करण्यात आला आहे.
सदर तिन्ही कामे सार्वजनिक बांधकाम विभागाच्या तांत्रिक मानकांनुसार पूर्ण करण्यात येणार असून पूर्ण झाल्यानंतर पंचायत समिती अंतर्गत सर्व विभाग एकाच ठिकाणी कार्यरत होणार आहेत. यामुळे ग्रामीण भागातील नागरिकांना विविध शासकीय सेवा अधिक सुलभ, जलद व पारदर्शक पध्दतीने उपलब्ध होणार आहेत. एकूण सुमारे 29 कोटी 40 लाख रूपयांहून अधिक निधी या कामांसाठी मंजूर करण्यात आला आहे. नुकत्याच झालेल्या निवडणुकांमध्ये निवडून आलेल्या नवनिर्वाचित सदस्यांना आता हक्काची नवीन इमारत मिळणार असल्याने सर्व पंचायत समिती सदस्यांनी व स्थानिक ग्रामस्थांनी समाधान व्यक्त करत राज्यमंत्री योगेश कदम यांचे आभार मानले आहेत.
दापोलीत ना. योगेश कदम यांच्या पाठपुराव्यामुळे दापोली पोलिस ठाणे व कर्मचाऱ्यांच्या वसाहतीचे बांधकाम सुरू असून दापोली उपजिल्हा रूग्णालयाच्या श्रेणीवर्धन इमारतीचे काम सुरू आहे. त्याचप्रमाणे दापोली शहराच्या मध्यवर्ता ठिकाणी बचतगटांसाठी इमारत उभारण्यात आली असून दापोली तहसिल कार्यालय येथे सर्व महसूल विभाग एकत्रित येण्यासाठी लवकरच नवीन इमारत उभारण्यात येणार आहे. याचवेळी पंचायत समिती साठी इमारत मंजूर झाल्याने दापोलीच्या सर्व कार्यालयाचे रूपडे बदलण्याची शक्यता निर्माण झाली आहे.