🔴गोव्यात लोकमान्य कल्चरल फाउंडेशनच्या सहकार्याने ४ फेब्रुवारीपासून राष्ट्रीय स्तरावरील भव्य बुक फेस्टिवल 

पणजी (प्रतिनिधी): नॅशनल बुक ट्रस्ट ऑफ इंडिया आणि लोकमान्य कल्चरल फाउंडेशन यांच्या सहकार्याने गोव्यात येत्या 4 फेब्रुवारी ते 8 फेब्रुवारी 2026 या कालावधीत बांदोडकर स्टेडियम, कॅम्पाल, पणजी येथे राष्ट्रीय स्तरावरील भव्य बुक फेस्टिवलचे आयोजन करण्यात आले आहे. गोव्यात प्रथमच इतक्या मोठ्या प्रमाणावर होणाऱ्या या बुक फेस्टिवलमध्ये देशभरातील 250 पेक्षा अधिक पुस्तक विक्रेते आपापली दालने उभारणार आहेत. या निमित्ताने गोमंतकीय जनतेला विविध प्रकारची पुस्तके उपलब्ध होणार असून प्रख्यात व नामवंत लेखक, साहित्यिक व कवी यांचे विचार ऐकण्याची संधी मिळणार आहे.

या बुक फेस्टिवलमध्ये गोव्याचे मुख्यमंत्री डॉ. प्रमोद सावंत तसेच देशातील अनेक नामवंत राजकीय नेते व विचारवंत सहभागी होणार आहेत. नॅशनल बुक ट्रस्ट ऑफ इंडिया दरवर्षी देशातील काही महत्त्वाच्या ठिकाणी बुक फेस्टिवलचे आयोजन करते. अलीकडेच पुणे येथे झालेल्या बुक फेस्टिवलला सुमारे 8 लाख नागरिकांनी प्रत्यक्ष उपस्थिती लावली होती आणि त्या माध्यमातून सुमारे 50 कोटी रुपयांच्या पुस्तकांची विक्री झाली होती.

गोवा बुक फेस्टिवलमध्ये मोठ्या प्रमाणावर गोमंतकीय वाचकवर्ग सहभागी होणार असून गोव्यातील शाळा व महाविद्यालयांतील विद्यार्थ्यांनाही या ठिकाणी आणले जाणार आहे. याशिवाय शिक्षकवर्गाचाही मोठ्या संख्येने सहभाग अपेक्षित आहे. बुक फेस्टिवलमध्ये विविध प्रकारची दालने उभारण्यात येणार असून त्यामध्ये नामवंत लेखकांशी प्रत्यक्ष भेट घेण्याची व त्यांचे विचार ऐकण्याची संधी मिळेल.

दररोज सायंकाळी एका मोठ्या व्यासपीठावर सांस्कृतिक कार्यक्रमांची मेजवानी असणार असून दुसऱ्या व्यासपीठावर साहित्यिक विचारांची मेजवानी रसिकांना अनुभवता येईल. मुलांसाठी स्वतंत्र दालन उभारण्यात येणार असून त्यामध्ये बालनाट्य, बालकथा तसेच मुलांना बौद्धिक खाद्य देणाऱ्या विविध उपक्रमांची आखणी करण्यात आली आहे. याशिवाय गोव्यातील मराठी, कोकणी आणि इंग्रजी साहित्यिकांना एकत्र आणून त्यांच्या विचारांचे आदानप्रदान घडवून आणले जाणार असून अनेक गोमंतकीय साहित्यिकांच्या कार्याचा सन्मानही केला जाणार आहे.

बुक फेस्टिवलच्या निमित्ताने लगतच्या परिसरात फूड फेस्टिवलचेही आयोजन करण्यात येणार असून त्यामध्ये विविध प्रकारचे तसेच पारंपरिक गोमंतकीय खाद्यपदार्थ उपलब्ध असतील. हा बुक फेस्टिवल यशस्वी करण्यासाठी गेल्या दोन महिन्यांपासून अनेक कार्यकर्ते प्रत्यक्ष राबत आहेत. या संमेलनासाठी केंद्र सरकार, केंद्राचे शिक्षण खाते, गोवा सरकार, पुणे येथील समर्थ युवा फाउंडेशन आणि लोकमान्य कल्चरल फाउंडेशन हे सहआयोजक आहेत.

नॅशनल बुक ट्रस्ट ऑफ इंडियाचे चेअरमन श्री. मिलिंद मराठे आणि संचालक श्री. युवराज मलिक यांनी गोवा बुक फेस्टिवलसाठी कामाची शिस्तबद्ध दिशा निश्चित केली आहे. गोव्यातील आयोजनाची विशेष जबाबदारी श्री. किरण ठाकूर यांच्यावर सोपविण्यात आली असून एनबीटीचे गोव्याचे प्रमुख प्रतिनिधी म्हणून प्रा. भूषण भावे हे कामकाज पाहत आहेत. गोव्यातील तमाम जनतेला या बुक फेस्टिवलमध्ये सहभागी करून घेतले जाणार असून सर्व सामाजिक संस्थांनी या उपक्रमासाठी आपले योगदान द्यावे, असे आवाहन करण्यात आले आहे.

या बुक फेस्टिवलचे अधिकृत कार्यालय नुकतेच गोव्याचे शिक्षण सचिव प्रसाद लोलकर (आयएएस) यांच्या हस्ते कार्यान्वित करण्यात आले आहे. हे कार्यालय इन्स्टिट्यूट मेनेझिस ब्रागांझा इमारतीच्या तळमजल्यावरील गोमंतक साहित्य सेवक मंडळाच्या सभागृहात कार्यरत आहे.

▶सविस्तर बातमी लिंकवर 👇🏻 

https://sagarwave.com

📞 व्हाट्सअप ग्रुप जॉईन लिंक

https://chat.whatsapp.com/GLUI6https://chat.whatsapp.com/GLUI6mjYZfeARsSectAexY