खेड : – शहराजवळील जिल्हा परिषद प्राथमिक शाळा भडगाव उसरेवाडी येथे ‘ पीएमश्री ‘ उपक्रमांतर्गत नुकतेच आयोजित करण्यात आलेले पाच दिवसीय भव्य हिवाळी शिबिर उत्साहात पार पडले.
दिनांक ६ एप्रिल २०२६ ते १० एप्रिल २०२६ या कालावधीत उत्साहात पार पडलेल्या या शिबिरात विद्यार्थ्यांच्या शारीरिक, मानसिक आणि बौद्धिक विकासासाठी विविध उपक्रम राबवण्यात आले. ​शिबिराचे उद्घाटन शालेय व्यवस्थापन समितीचे अध्यक्षा सौ. साक्षी सकपाळ आणि मुख्याध्यापिका सौ. खेडेकर यांच्या हस्ते करण्यात आले. या पाच दिवसांच्या कालावधीत विद्यार्थ्यांसाठी चित्रकला, रेखाचित्र कार्यशाळा, कथाकथन, हस्तकला आणि टाकाऊतून टिकाऊ वस्तू बनवणे असे उपक्रम घेण्यात आले. तसेच, मैदानी खेळांमध्ये लेझीम, खो-खो आणि साहसी खेळांमध्ये ट्रेकिंग व तंबू ठोकण्याचे (कॅम्पिंग) प्रशिक्षण देण्यात आले.
​तज्ज्ञांचे मार्गदर्शन : – या शिबिरासाठी शिक्षण विभागातील विविध मान्यवरांना व तज्ज्ञांना मार्गदर्शक म्हणून आमंत्रित करण्यात आले होते. यामध्ये प्रामुख्याने लक्ष्मण चोरगे (कलाशिक्षक नांदिवली दंड) व श्री. वागस्कर (सुसेरी नं. ०१ ) यांनी उपस्थित राहून विद्यार्थ्यांना शैक्षणिक वाटचालीबद्दल मोलाचे मार्गदर्शन केले. तसेच, स्थानिक कला शिक्षकांनी चित्रकलेतील बारकावे शिकवले, तर क्रीडा मार्गदर्शकांनी साहसी खेळांचे प्रात्यक्षिक करून दाखवले.