नागपूर : भारतीय जनता पार्टी, महाराष्ट्र प्रदेशाच्या वतीने आयोजित करण्यात येणाऱ्या ‘श्री गुरु रविदास महाराज वस्तीगृह संपर्क अभियान’ अंतर्गत प्रदेश संयोजकपदी भाजपचे माजी प्रदेश उपाध्यक्ष ॲड. धर्मपाल मेश्राम यांची नियुक्ती करण्यात आली आहे. महाराष्ट्र प्रदेशाध्यक्ष मा. रवींद्रजी चव्हाण यांनी २७ ऑक्टोबर २०२६ रोजी जाहीर केलेल्या अभियानाच्या प्रदेश समितीत त्यांच्यावर ही महत्त्वपूर्ण जबाबदारी सोपविण्यात आली आहे. हे अभियान २६ नोव्हेंबर २०२६ ते १५ जानेवारी २०२७ या कालावधीत राबविण्यात येणार आहे.
या नियुक्तीबद्दल ॲड. धर्मपाल मेश्राम यांनी महाराष्ट्र राज्याचे मुख्यमंत्री मा. देवेंद्रजी फडणवीस, भारतीय जनता पार्टीचे महाराष्ट्र प्रदेशाध्यक्ष मा. रवींद्रजी चव्हाण तसेच पक्षाच्या वरिष्ठ नेतृत्वाचे मनःपूर्वक आभार मानले आहेत. पक्षाने विश्वासाने सोपविलेली जबाबदारी पूर्ण निष्ठेने, समर्पित भावनेने आणि प्रभावीपणे पार पाडण्याचा निर्धार त्यांनी व्यक्त केला.
अभियानाच्या यशस्वितेसाठी विभागनिहाय सहसंयोजकांची नियुक्ती
महाराष्ट्रभर ‘श्री गुरु रविदास महाराज वस्तीगृह संपर्क अभियान’ प्रभावीपणे राबविण्यासाठी प्रदेश समितीच्या माध्यमातून विविध विभागांमध्ये संयोजक व सहसंयोजकांच्या नियुक्त्या करण्यात आल्या आहेत. त्यांचा तपशील पुढीलप्रमाणे आहे.
विदर्भ विभाग
- सहसंयोजक : श्री. राहुल तुपसांडे
उत्तर महाराष्ट्र विभाग
- सहसंयोजक : प्रा. भानुदास बेरड
मराठवाडा विभाग
- सहसंयोजक : प्रा. पांडुरंग मांडकीकर
पश्चिम महाराष्ट्र विभाग
- सहसंयोजक : श्री. भरत आमदापुरे
कोकण-ठाणे विभाग
- सहसंयोजक : प्रा. वर्षा भोसले माने
या विभागनिहाय नियुक्त्यांच्या माध्यमातून अभियानाची उद्दिष्टे राज्याच्या विविध भागांमध्ये प्रभावीपणे पोहोचविण्यासाठी संघटनात्मक समन्वय साधला जाणार आहे.
वस्तीगृहांपर्यंत संत गुरु रविदास महाराजांचे विचार पोहोचविण्यावर भर
या अभियानाच्या माध्यमातून वस्तीगृहांमध्ये राहणाऱ्या विद्यार्थ्यांपर्यंत संत गुरु रविदास महाराज यांचे समतावादी विचार, सामाजिक समरसता, बंधुता, सामाजिक प्रबोधन आणि राष्ट्रहिताची भावना पोहोचविण्यावर भर दिला जाणार आहे. विद्यार्थ्यांशी संवाद साधणे, त्यांच्या मनात सामाजिक बांधिलकीची जाणीव निर्माण करणे आणि संतांच्या विचारांचा व्यापक प्रसार करणे, ही अभियानाची महत्त्वाची उद्दिष्टे असतील.
प्रदेशाच्या संयोजकपदाची जबाबदारी स्वीकारताना ॲड. धर्मपाल मेश्राम यांनी अभियानातील सर्व सहकारी व सहसंयोजकांना शुभेच्छा दिल्या. राज्यभरातील सर्व विभागांमध्ये हे अभियान प्रभावीपणे राबविण्यासाठी प्रत्येकाने समन्वयाने, नियोजनबद्ध पद्धतीने आणि अत्यंत तडफेने कार्य करावे, असे आवाहन त्यांनी केले.
“पक्षाने माझ्यावर दाखविलेला विश्वास सार्थ ठरविण्यासाठी मी पूर्ण ताकदीने कार्य करणार आहे. संत गुरु रविदास महाराज यांचे विचार वस्तीगृहांतील विद्यार्थ्यांपर्यंत पोहोचविणे, सामाजिक प्रबोधनाला चालना देणे आणि अभियानाची उद्दिष्टे तळागाळापर्यंत पोहोचविणे यासाठी सर्व सहकाऱ्यांना सोबत घेऊन समन्वयाने काम करणार आहे,” अशी भावना ॲड. धर्मपाल मेश्राम यांनी व्यक्त केली.
महाराष्ट्रभरातील वस्तीगृहांमध्ये संपर्क वाढवून विद्यार्थ्यांशी संवाद साधणे आणि संत गुरु रविदास महाराज यांच्या समता, बंधुता व मानवतेच्या विचारांचा प्रसार करणे, यासाठी सर्वांनी संघटितपणे आणि समर्पित भावनेने कार्य करण्याचा संकल्प या निमित्ताने व्यक्त करण्यात आला.
