पुणे : राज्यात मान्सूनपूर्व पावसाची परिस्थिती दिसून येत आहे. लवकरच राज्यात मान्सून दाखल होण्याची शक्यता हवामान विभागाने वर्तवली आहे. 2 जून 2026 रोजी राज्यातील 23 जिल्ह्यांसाठी हवामान विभागाकडून पावसाचा यलो अलर्ट जारी करण्यात आला आहे. तसेच कोकणातील 5, उत्तर महाराष्ट्रातील 5, पश्चिम महाराष्ट्रातील 2, मराठवाड्यातील 3 आणि विदर्भातील 7 जिल्ह्यांसाठी अलर्ट देण्यात आला आहे. जाणून घ्या हवामान विभागाचा सविस्तर अंदाज.
कोकण : कोकण विभागातील पालघर, ठाणे, रायगड, रत्नागिरी आणि मुंबई या जिल्ह्यांसाठी पावसाचा यलो अलर्ट जारी करण्यात आला आहे. काही भागांत ढगाळ वातावरणासह हलक्या ते मध्यम स्वरूपाच्या पावसाची शक्यता आहे. तसेच काही ठिकाणी मेघगर्जनेसह पावसाची नोंद होऊ शकते.
उत्तर महाराष्ट्र : उत्तर महाराष्ट्रातील अहिल्यानगर, धुळे, नंदुरबार, जळगाव आणि नाशिक या जिल्ह्यांसाठी यलो अलर्ट जारी करण्यात आला आहे. या विभागात विजांच्या कडकडाटासह पावसाच्या सरी कोसळण्याची शक्यता असल्याचा हवामान विभागाचा अंदाज आहे.
पश्चिम महाराष्ट्र : पश्चिम महाराष्ट्रातील पुणे आणि सातारा जिल्ह्यांत वातावरण ढगाळ राहण्याची शक्यता आहे. या विभागात पावसाचा अंदाज वर्तवण्यात आला आहे. पुणे जिल्ह्यासाठी यलो अलर्ट जारी करण्यात आला असून, काही ठिकाणी जोरदार पावसाच्या सरी कोसळण्याची शक्यता आहे.
मराठवाडा : मराठवाडा विभागातील छत्रपती संभाजीनगर, जालना आणि बीड या जिल्ह्यांसाठी यलो अलर्ट जारी करण्यात आला आहे. या भागांत अधूनमधून पावसाच्या सरी कोसळण्याची शक्यता आहे. तसेच काही ठिकाणी वातावरणातील आर्द्रतेत वाढ होण्याची शक्यता आहे.
विदर्भ : विदर्भातील अमरावती, भंडारा, चंद्रपूर, गडचिरोली, गोंदिया, नागपूर आणि वर्धा या जिल्ह्यांसाठी यलो अलर्ट जारी करण्यात आला आहे. या भागांत मेघगर्जना, विजांचा कडकडाट आणि वादळी वाऱ्यासह पावसाची शक्यता हवामान विभागाने वर्तवली आहे.
