जळगाव : खगोलप्रेमींसाठी मंगळवारची संध्याकाळ अत्यंत खास असणार आहे. सूर्यमालेतील दोन सर्वात तेजस्वी आणि बलाढ्य ग्रह, ‘शुक्र’ (Venus) आणि ‘गुरु’ (Jupiter) उद्या एकमेकांच्या अत्यंत जवळ येणार आहेत. खगोलशास्त्रामध्ये या विहंगम दृश्याला ‘ग्रहांची युती’ (Conjunction) असे म्हटले जाते.
जळगाव शहरासह संपूर्ण महाराष्ट्र आणि भारतातून ही खगोलीय घटना उघड्या डोळ्यांनी सहज पाहता येणार आहे. जागतिक स्तरावर प्रसिद्ध असलेल्या ‘नॅशनल जिओग्राफिक’ (National Geographic) संस्थेने आपल्या विज्ञान वृत्तात (Science Report) या अद्भुत खगोलीय घटनेचे ‘कॉस्मिक किस’ (Cosmic Kiss) असे अतिशय सुंदर आणि रोमँटिक वर्णन केले आहे.
आपण जेव्हा पृथ्वीवरून हे दृश्य पाहू, तेव्हा शुक्र आणि गुरु हे दोन ग्रह अवघ्या १.५ ते १.६ अंश (Angular Distance) कोणीय अंतरावर दिसतील. जर आपण आपल्या हाताचे लहान बोट डोळ्यांसमोर धरले, तर ते आकाशातील जेवढी जागा व्यापते, साधारण तेवढ्याच अंतरावर हे दोन्ही ग्रह एकमेकांच्या शेजारी चमकताना दिसतील. पश्चिम आकाशात सूर्यास्तानंतर लगेचच, म्हणजे संध्याकाळी ७:३० ते रात्री ८:३० या वेळेत हे विहंगम दृश्य अनुभवता येईल. अंधार पडू लागताच पश्चिम क्षितीजावर मिथुन आणि कर्क राशीच्या दरम्यान हिऱ्यासारखा लखलखणारा शुक्र आणि त्याच्या शेजारी काहीसा पिवळसर रंगाचा भव्य गुरु ग्रह नागरिकांना स्पष्टपणे पाहता येईल. साधारण ८:३० नंतर हे ग्रह क्षितीजाखाली मावळू लागतील, त्यामुळे ७:४५ ते ८:१५ ही वेळ निरीक्षणासाठी सर्वोत्तम असेल.
