चिपळूण : चिपळूणच्या ऐतिहासिक वैभवाची आणि मराठ्यांच्या शौर्यगाथेची साक्ष देणाऱ्या ऐतिहासिक दुर्ग गोविंदगडाच्या जतन व संवर्धनासाठी राजे सामाजिक प्रतिष्ठान, गोवळकोट यांच्या वतीने रविवार, दिनांक १ नोव्हेंबर २०२६ रोजी सकाळी ७.३० वाजता स्वच्छता मोहिमेचा शुभारंभ करण्यात येणार आहे.
ऐतिहासिक दुर्ग गोविंदगड हा केवळ दगड-मातीचा दुर्ग नसून आपल्या पूर्वजांच्या पराक्रमाचा, स्वाभिमानाचा आणि ऐतिहासिक वारशाचा अमूल्य ठेवा आहे. या दुर्गाने इतिहासातील अनेक शौर्यपूर्ण घटनांचा साक्षीदार म्हणून काळाच्या प्रवाहात आपले अस्तित्व जपले आहे.
अशा ऐतिहासिक वास्तूचे जतन करणे ही केवळ एखाद्या संस्थेची जबाबदारी नसून संपूर्ण समाजाचे कर्तव्य आहे
राजे सामाजिक प्रतिष्ठान गेल्या १२ वर्षांपासून ऐतिहासिक वारसा जतन व संवर्धनासाठी सातत्याने विविध उपक्रम राबवत आहे. याच कार्याचा पुढील टप्पा म्हणून ही स्वच्छता मोहीम हाती घेण्यात आली आहे.
ही मोहीम केवळ स्वच्छता करण्यापुरती मर्यादित नसून ऐतिहासिक वारशाप्रती जनजागृती निर्माण करणे आणि पुढील पिढ्यांपर्यंत आपल्या इतिहासाचा अभिमान पोहोचवणे हा या मोहिमेमागील मुख्य उद्देश आहे.
या ऐतिहासिक कार्यात सामाजिक संस्था, विविध मंडळे, शाळा-महाविद्यालये, प्रशासकीय यंत्रणा, इतिहासप्रेमी तसेच गोवळकोट व चिपळूण परिसरातील नागरिकांनी मोठ्या संख्येने सहभागी व्हावे, असे आवाहन राजे सामाजिक प्रतिष्ठानच्या वतीने करण्यात येत आहे.
इतिहास केवळ ऐकायचा नसतो, तो जपायचाही असतो! चला, आपल्या ऐतिहासिक वारशाच्या संवर्धनासाठी एकत्र येऊया!
दिनांक : रविवार, १ नोव्हेंबर २०२६
वेळ : सकाळी ७.३० वाजता
ठिकाण : ऐतिहासिक दुर्ग गोविंदगड, गोवळकोट
