चिपळूण : ग्रामविकासाच्या कामाला प्रसिद्धीपेक्षा प्रत्यक्ष कर्तृत्वाची जोड मिळाली की त्याची दखल व्यापक पातळीवर घेतली जाते. मोरवणे ग्रामपंचायतीच्या सरपंच तथा शिवसेना (उद्धव बाळासाहेब ठाकरे) पक्षाच्या सौ. संचिता सचिन जाधव यांच्या उल्लेखनीय कार्याची अशीच दखल घेण्यात आली असून, नालंदा ऑर्गनायझेशनच्या सर्वेक्षणादरम्यान त्यांच्या उत्कृष्ट कामगिरीबद्दल ‘महाराष्ट्ररत्न गुणगौरव सन्मान सोहळा २०२६’ अंतर्गत त्यांचा ‘आदर्श सरपंच’ म्हणून गौरव करण्यात आला.
रत्नागिरी जिल्ह्यातील चिपळूण तालुक्यातील मोरवणे येथे केलेल्या उत्कृष्ट कामगिरीची नोंद घेत हा सन्मान प्रदान करण्यात आल्याचे पुरस्कारपत्रात नमूद करण्यात आले आहे. ग्रामविकासाच्या क्षेत्रात केलेल्या कामाची संस्थात्मक सर्वेक्षणातून झालेली दखल ही मोरवणे गावासाठी निश्चितच अभिमानाची बाब आहे.
सरपंचपद हे केवळ पद नसून गावाच्या विकासाची जबाबदारी आहे. ग्रामस्थांच्या अपेक्षा, स्थानिक प्रश्न आणि उपलब्ध साधनसामग्री यांचा समन्वय साधत गावाच्या प्रगतीसाठी काम करण्याची गरज असते. या भूमिकेतून सौ. जाधव यांनी केलेल्या कार्याचा गौरव झाल्याने त्यांच्या कामाला राज्यस्तरीय व्यासपीठावर मान्यता मिळाली आहे.
राजकारणाच्या पलीकडे जाऊन गावाच्या विकासाच्या कामाला केंद्रस्थानी ठेवणे हाच लोकप्रतिनिधित्वाचा खरा अर्थ आहे. त्यामुळे मोरवणेच्या सरपंच संचिता जाधव यांना मिळालेला हा सन्मान त्यांच्या वैयक्तिक कार्याचा गौरव असला, तरी त्याचबरोबर मोरवणे गावाच्या विकासाभिमुख वाटचालीचाही सन्मान आहे.
शिवसेना (उद्धव बाळासाहेब ठाकरे) चिपळूण तालुकाप्रमुख श्री. बळीराम गुजर यांनी संचिता जाधव यांचे मनःपूर्वक अभिनंदन केले. मोरवणे गावातील उल्लेखनीय कामाची दखल घेत त्यांना मिळालेला हा सन्मान अभिमानास्पद असून, त्यांच्या पुढील ग्रामविकासाच्या कार्यास मनःपूर्वक शुभेच्छा, अशी भावना त्यांनी व्यक्त केली.
मोरवणेच्या मातीत केलेल्या कामाची दखल सन्मानाच्या व्यासपीठावर घेतली गेली आहे. पद मोठे की लहान यापेक्षा त्या पदावरून जनतेसाठी किती काम उभे राहते, हे महत्त्वाचे आणि याच कर्तृत्वाला मिळालेला हा गौरव निश्चितच प्रेरणादायी आहे.
