मंडणगड : तालुक्यातील देव्हारे-वडवली-आतळे रस्त्यावर पुन्हा एकदा बिबट्याचा वावर आढळून आल्याने परिसरातील नागरिकांमध्ये भीतीचे वातावरण निर्माण झाले आहे. यापूर्वीही या परिसरात बिबट्याचा वावर आढळून आला होता. आता पुन्हा बिबट्याची हालचाल दिसून आल्याने नागरिकांच्या सुरक्षिततेचा प्रश्न ऐरणीवर आला आहे.
देव्हारे-वडवली-आतळे हा मार्ग नागरिकांच्या दैनंदिन वर्दळीचा असून, सकाळी तसेच सायंकाळच्या वेळी या रस्त्यावर दुचाकीस्वार आणि नागरिकांची मोठ्या प्रमाणात ये-जा सुरू असते. अशा वर्दळीच्या मार्गावर बिबट्याचा वावर असल्याने नागरिकांमध्ये भीतीचे सावट पसरले आहे.
बिबट्याच्या वाढत्या वावराची गांभीर्याने दखल घेऊन वनविभागाने संबंधित परिसराची तातडीने पाहणी करावी, तसेच बिबट्याच्या हालचालींवर लक्ष ठेवण्यासाठी गस्त वाढवावी, अशी मागणी नागरिकांकडून करण्यात येत आहे. परिसरात आवश्यक त्या प्रतिबंधात्मक उपाययोजना करून नागरिकांना सुरक्षिततेबाबत मार्गदर्शन करावे, अशीही अपेक्षा व्यक्त होत आहे.
नागरिकांनी घ्यावी काळजी
बिबट्याचा वावर असलेल्या परिसरातील नागरिकांनी विशेष खबरदारी घेण्याचे आवाहन करण्यात आले आहे. रात्रीच्या वेळी एकट्याने प्रवास करणे टाळावे. बिबट्या दिसल्यास शांत राहावे. बिबट्याच्या जवळ जाण्याचा किंवा त्याला त्रास देण्याचा प्रयत्न करू नये. लहान मुले, महिला आणि ज्येष्ठ नागरिकांनी विशेष काळजी घ्यावी. बिबट्या आढळून आल्यास तत्काळ वनविभागाला माहिती द्यावी, असे आवाहन करण्यात आले आहे.
वनविभागाने बिबट्याचा वावर असलेल्या परिसरात जनजागृती करून नागरिकांना सतर्कतेच्या सूचना द्याव्यात. तसेच बिबट्याच्या हालचालींची माहिती मिळाल्यानंतर तातडीने पाहणी करून आवश्यक उपाययोजना कराव्यात, अशी मागणी ग्रामस्थांकडून होत आहे.
“बिबट्याचा वावर असलेल्या परिसरात एखादी अनुचित घटना घडण्यापूर्वीच वनविभागाने ठोस पावले उचलावीत,” अशी अपेक्षा देव्हारे, वडवली-आतळे परिसरातील नागरिकांकडून व्यक्त करण्यात येत आहे.