चिपळूण : लाडक्या गणरायाच्या आगमनाने अवघे चिपळूण गणेशमय झाले असतानाच दीड दिवसांच्या एक सार्वजनिक तर २८५५ खाजगी बाप्पाना मंगळवारी सायंकाळी पारंपरिक भक्तिमय आणि भावूक वातावरणात निरोप देण्यात आला. ‘गणपती बाप्पा मोरया… पुढच्या वर्षी लवकर या!’ च्या जयघोषाने शहरातील विविध भाग दुमदुमून गेले. ढोल-ताशांचा गजर, पारंपरिक वाद्यांचा निनाद आणि गुलालाची उधळण करत गणेशभक्तांनी आपल्या लाडक्या बाप्पाला निरोप दिला. गणरायाच्या विसर्जनासाठी दुपारनंतरच भाविकांची लगबग सुरू झाली होती. आकर्षक सजावट केलेल्या वाहनांमधून तसेच काही भाविकांनी गणेशमूर्ती हातात घेऊन विसर्जनस्थळांकडे प्रस्थान केले. अनेक घरांमध्ये विसर्जनापूर्वी श्रींची विधिवत पूजा, आरती आणि नैवेद्य अर्पण करण्यात आला. ‘बाप्पा, आमच्या कुटुंबावर सदैव कृपादृष्टी ठेवावी आणि पुढील वर्षी पुन्हा सुख-समृद्धी घेऊन यावे’, अशी भावपूर्ण प्रार्थना करण्यात आली.
शहरातील बाजारपूल, खंड बावशेवाडी नदी, बहादूरशेख नाक्याजवळील वाशिष्ठी नदी तसेच पाग नदीकिनारी असलेल्या विसर्जनस्थळांवर सायंकाळी भाविकांची मोठी गर्दी झाली होती. काही ठिकाणी महिलांनी पारंपरिक पद्धतीने आरती करून बाप्पाला निरोप दिला. विसर्जनाच्या वेळी ‘गणपती बाप्पा मोरया’चा जयघोष आणि ढोल-ताशांच्या गजरामुळे परिसरातील वातावरण भक्तिमय झाले होते.
निरोप देताना डोळे पाणावले
दीड दिवस बाप्पाची सेवा, पूजा-अर्चा आणि आरती केल्यानंतर निरोपाची वेळ येताच अनेक गणेशभक्त भावूक झाले. लहान मुलांपासून ज्येष्ठ नागरिकांपर्यंत प्रत्येकाच्या चेहऱ्यावर बाप्पाला निरोप देण्याची हुरहूर दिसून येत होती. ‘पुढच्या वर्षी लवकर या’ म्हणत भाविकांनी आपल्या लाडक्या गणरायाला भावपूर्ण निरोप दिला.
दरम्यान, विसर्जनाच्या पार्श्वभूमीवर स्थानिक प्रशासन, चिपळूण नगर परिषद आणि संबंधित यंत्रणांकडून भाविकांच्या सोयीसाठी आवश्यक व्यवस्था करण्यात आली होती. गर्दीचे नियोजन तसेच सुरक्षेच्या दृष्टीने पोलिस प्रशासनाकडूनही बंदोबस्त ठेवण्यात आला होता.
पर्यावरणपूरक विसर्जनाचा संदेश
गणेशमूर्तीचे विसर्जन करताना पर्यावरणाची काळजी घेण्याचे आवाहनही करण्यात आले. कृत्रिम विसर्जन तलाव, निश्चित विसर्जनस्थळे आणि पर्यावरणपूरक पद्धतींचा वापर करण्यावर भर देण्यात आला. प्रशासनाच्या सूचनांचे पालन करून गणेशोत्सव पर्यावरणपूरक पद्धतीने साजरा करण्याचे आवाहन करण्यात आले.
दीड दिवसांच्या गणरायाच्या विसर्जनानंतरही चिपळूणमधील गणेशोत्सवाचा उत्साह मात्र कायम आहे. पुढील काही दिवसांत पाच दिवस, सात दिवस तसेच अनंत चतुर्दशीला होणाऱ्या विसर्जनासाठी गणेशभक्त सज्ज झाले आहेत. त्यामुळे आगामी दिवसांतही चिपळूण शहर आणि तालुक्यात गणपती बाप्पा मोरया… पुढच्या वर्षी लवकर या!’ चा जयघोष घुमत राहणार आहे.
