मंडणगड : येथील सावित्रीबाई फुले शिक्षण प्रसारक मंडळाचे लोकनेते गोपीनाथजी मुंडे कला, वाणिज्य व विज्ञान महाविद्यालय व कर्मवीर भि. रा. तथा दादा इदाते कनिष्ठ महाविद्यालयात राष्ट्रीय सेवा योजना विभागाच्या वतीने ‘80 व्या स्वातंत्र्य’ दिनानिमित्त दिं. 9 ते 17 ऑगस्ट दरम्यान ‘हर घर तिरंगा’ सप्ताहाचे आयोजन करण्यात आले होते. या कार्यक्रमा अंतर्गत महाविद्यालयाच्या वतीने विविध उपक्रम राबविण्यात आले.
सदर सप्ताहाची सुरुवात स्वातंत्र्य लढयात योगदान देणा-या स्वातंत्र्य सेनानी यांच्या कार्याचा परिचय या विषयावर विद्यार्थ्यांनी तयार केलेल्या ‘भित्तीपत्रक’ प्रकाशनाने झाली. यामध्ये प्रामुख्याने महात्मा गांधी, लोकमान्य टिळक, दादाभाई नौरोजी, पंडित जवहारलाल नेहरु, भगतसिंग, राजगुरु आदींचा समावेष होता. सदर भित्तीपत्रकाचे उद्घाटन महाविद्यालयाचे प्रभारी प्राचार्य डॉ.वाल्मिक परहर यांच्या हस्ते करण्यात आले. महाविद्यालयातील सर्व विद्यार्थ्यांनी याचा लाभ घेतला.
त्यानंतर महाविद्यालय परिसर व तहसीलदार कार्यालय या ठिकाणी ‘स्वच्छता अभियान’ राबवून परिसर स्वच्छ करण्यात आला. तसेच ‘तिरंगा सन्मान शपथ’ हा कार्यक्रम राबविण्यात आला. दि. 13 ऑगस्ट रोजी मंडणगड तालुक्यातील एकत्रित तिरंगा रॅलीमध्ये महाविद्यालयातील सर्व विद्यार्थी सहभागी झाले होते. त्याच वेळी विद्यार्थ्यांनी तिरंग्यासोबत सेल्फी अभियान राबवले. एन. एस.एस. विभागातील स्वयंसेवकांना ‘एक पेड मॉं के नाम’ अंतर्गत संस्थेचे संचालक श्री. आदेश मर्चंडे यांच्या हस्ते रोपांचे वाटप करण्यात आले. यावेळी महाविद्यालयाचे प्राचार्य डॉ. वाल्मिक परहर यांनी आवाहन केले की सदरील वृक्षांचे स्वयंसेवकांनी आपल्या परिसरात त्याची लागवड करुन त्यांचे संगोपन करण्याची जबाबदारी घ्यावी. स्वातंत्र्यदिनी स्वयंसेवकांनी ‘भारतीय स्वातंत्र्य लढयासंदर्भातील गीते’ सादर केली.
या विविध कार्यक्रमांमध्ये कनिष्ठ व वरिष्ठ महाविद्यालयातील विद्यार्थ्यांनी उत्फूर्त सहभाग नोंदवला. हे सर्व उपक्रम यशस्वीपणे राबविण्यासाठी महाविद्यालयाचे प्रभारी प्राचार्य डॉ. वाल्मिक परहर, उपप्राचार्य डॉ. विष्णु जायभाये यांच्या मार्गदर्शनाखाली एन एस एस कार्यक्रमाधिकारी प्रा. संदीप निर्वाण, डॉ. महेश कुलकर्णी, डॉ.संगीता घाडगे, प्रा. अशोक कंठाळे, प्रा. साई पवार यांनी परिश्रम घेतले.